Til skýringar á fyrra bloggi

Þrátt fyrir að ást á milli tveggja einstaklinga sé til staðar, þá er ótrúlega erfitt að skeyta saman tvær brotnar fjölskyldur.   Hvorugt okkar hefur haft tíma til að takast á við gamla drauga og gera upp fyrri sambönd og fyrra líf.  Við vorum farin að rugla saman reitum áður en allt slíkt ferli var lokið og í raun vorum við ekki einu sinni byrjuð á því.

Núna erum við að reyna að vera skynsamleg, þó svo að skynsemin hafi ekki fengið að ráða ríkjum síðust vikur og mánuði.  Það hlaut að koma að bakslaginu, það vissum við öll.  Í kjölfarið höfum við því tekið nokkur skref aftur á bak og gefið hvort öðru rými til að anda og klára ákveðin mál.  Við höldum samt áfram að rugla saman reitum, bara á miklu minni hraða .

Annars er bara allt gott að frétta. Ég er nýkomin úr tæpri viku vinnuferð í Skotlandi/Englandi. Er búin að vera algjörlega á haus í vinnunni og lítill tími gefist í eitt né neitt.  Þessari vinnutörn líkur um miðjan mars...vona ég. Og þá eru nú eiginlega bara komnir páskar. Ja hérna hér, tíminn æðir hreinlega áfram. Ekki að undra þó maður haldi varla haus í látunum.

Jennifer aupairin mín er farin. Hún byrjaði aftur með kærastanum sínum og ákvað að láta hjarta sitt ráða ferðinni og fara aftur heim.  Krakkarnir eru sem sagt að byrja aftur í skólaskjóli og ég aftur orðin ein með 2 börn, 150% vinnu og stórt heimili....  sem sagt allt í gangi eins og alltaf.